Mensch war des mal wieder schee,
a Ausflugsfahrt an Bodasee.
Ds`Wetter hat mitg`macht über`n Tag,
wenn Engel reisad: gar koi Frag!
En Meersburg a`komma goht`s glei,
en`s Reschtaura „Wilder Ma“ nei,
zom Weißwurschtfrühstück, Woizabier,
der Tag fangt guad a, glaubad`s mir.
A Gascht drzua von Immaschtaad,
rommkomma isch er mit am Rad,
nach Meersburg, des war oser Ziel,
des zom agugga biadad viel.
Schtrandpromenade, Eiscafe,
wer guad ds`Fuaß war, der nauf en d`Höh.
Von Meersburg oba, welch ein Blick,
dr See, ond von dr Schweiz a Schtück.
Wenn e jetzt d`Zeit a`halta könnt,
a Moment, der jedam sei vergönnt.
D`Hinfahrt, wia g`wohnt isch ruhig gwäa,
d`Rückfahrt hingega, was isch gschäa?
Schtimmungsvoll, war se, obadrei,
geschprächig war ma jetzt drbei.
Erennerunga kamad hoch,
vor me wia fuffzg Johr, woisch des noch.
Thema war wia ghet`s anderschd sei,
dr Fuaßball, oim fällt dazua ei,
a G`schicht, heut geits dui nemme, noi.
Denn –
Adam hat g`holt manch aus am Bett,
em Sonndig morgads, oft viel z`schpät,
wenn`s ganga isch zom Auswärtsschpiel,
an Nerva hat es da braucht viel.
Oina von so manch Fuaßballgschicht,
warscht et drbei, schier glaubscht es nicht.
Schee war se scho damals dui Zeit,
soscht däddschd et drüber schwätza heut.
Günther, dr Fahrer ganz entschpannt,
auf am Wäag z`rück ens Voralbland,
hat sei Gefährt fescht en dr Hand.
D`Versorgung an Bord, dui war guad,
denn an Getränk, da hat`s et g`fehlt,
vom Konne, der des emmer duad,
wird des wieder bereit geschtellt.
Oi A`merkung der Wilfried macht,
„früher, da hemmer scho me g`schafft“.
„Sell war amol dr Kommentar“,
„Ja, ja, früher manch`s anderscht war.
En Berghüla kommad mir a,
über d`Alb fährt dr Günther na,
mir kehrad no em Ochsa ei,
denn da, da soll dr Abschluss sei.
Hernach goht`s mit dr Hoimfahrt weiter,
ds`Ende vom Tag, rückt näher, leider.
Konne, Wilfried, Elke, Helmut, Günther,
mir älle dia warad dabei,
sagad danke, ond gern auf`s „Neu“.
Der Protokoller
